|
Il term chanzun populara sa derasa en l’intschess rumantsch suenter il 1850. El stat en connex cun la scuverta da la litteratura populara, succedida en Europa en il spiert da la romantica. Sin basa dal model da las grondas collecziuns da texts e da melodias realisadas en il territori tudestg tenor la tradiziun populara, han exponents da la renaschientscha retorumantscha cumenzà a rimnar il stgazi da chanzuns da las regiuns rumantschas. Las melodias, sortidas directamain da la pratica da chantar, èn documentadas pir tard. La registraziun ha cumenzà cun ina tscherta sistematica en ils onns 1920–40 en il rom d’ina campagna che dueva cumpigliar l’entir territori rumantsch (Werner Wehrli, Gian Gianet Cloetta, Hanns in der Gand, Tumasch Dolf, Alfons Maissen). [Tenor e-lir]. |
