|
Il term populaziun mundiala denominescha il dumber da persunas che vivan actualmain sin la Terra. Medemamain sa laschan far indicaziuns davart la situaziun en temps istorics; quant precisas che quellas èn dependa da la basa statistica avant maun. En pli vegnan fatg calculaziuns areguard il svilup futur dal dumber da la populaziun; er qua poi be sa tractar d’extrapolaziuns ipoteticas. Las disciplinas demografia e geografia da la populaziun examineschan il stadi actual, il svilup istoric, la repartiziun geografia e la dinamica da la populaziun mundiala e fan prognosas. [Tenor Vichipedia].
(Foto: Ana Paula Hirama / CC BY-SA 2.0) |
