|
Il center dal moviment refurmatoric en il Grischun ha furmà Cuira, nua che la nova cretta è s’affirmada il 1523–27 sut Johannes Comander. Cun quai che nagina sentenzia n’era suandada a la Disputaziun da religiun a Glion (1526), ha la nova cretta pudì sa derasar senza impediments. Entant che la plipart da las plaivs da la Lia da las Diesch Dretgiras e parts da la Lia Grischa èn aderidas gia vers la fin dals onns 1520/30 a la refurmaziun, han l’Engiadina e las vals vischinantas adoptà la nova cretta per gronda part tranter il 1550 ed il 1575. Singulas plaivs da la Lia da la Chadé han perfin fatg il pass pir vers la fin dal 16avel e l’entschatta dal 17avel tschientaner. Perquai ha era l’organisaziun d’ina baselgia refurmada durà ditg. [Tenor e-lir]. |
