|
La Tirchia è in pajais che s'extenda sin dus continents. Chapitala da la Tirchia è Ankara. L'Anatolia, la part asiatica dal territori tirc, cumpiglia ca. 97% da la surfatscha. La part europeica ha num Trachia. Las duas parts vegnan separadas da las duas stretgas da mar Bosporus e Dardanellas. Là giascha la citad dad Istanbul, la pli gronda citad da la Tirchia e center cultural ed economic. L'istorgia pli nova da la Tirchia vegn dominada da la dumonda suenter l'equiliber tranter stadi islamic e secularisaziun. |
