|
La Punt Russein collia las vischnanca da Sumvitg e Mustér sco era la Sur- e Sutsassiala. La Val Russein vegniva pli baud guntgida sur Cumpadials via la riva sanestra dal Rain a Madernal e Disla. Il 1669 ha l'avat Adalbert II da Mustér laschà construir in'emprima punt da crap ad artg sur la chavorgia. Oz mainan trais punts sur la Val Russein: la Punt da Barcuns, ina punt da lain cun tetg construida il 1857 (anc averta per persunas), la punt da crap da la Viafier retica cun ses quatter artgs, erigida il 1911, e la punt da betun dal 1938 cun artgadas da 82 m lunghezza (per automobils). Ina tavla commemorativa a la Punt Russein regorda als perscrutaders da la natira sursilvana Arnold Escher von der Linth, Placi a Spescha e Gottfried Ludwig Theobald. |
