|
Da striuns e striegn discurran gia funtaunas da l’antica. La persecuziun ch’ è succedida dapi la fin dal temp medieval è dentant in product da la demonologia da la baselgia cristiana. 1326 ha Roma declerà il striegn per ina furma d’eresia: strias e striuns han fatg in patg cun il diavel, els gidan il diavel a derasar il nausch en il mund e ston vegnir persequitads senza cumpassiun. Ils tractats «Formicarius» e «Hexenhammer» accentueschan la rolla da la dunna en il striunim. Da la fin dal 14avel tschientaner enfin al 18avel tschientaner han adina puspè gì lieu process da striegn en l’entira Europa. Il punct culminant è stà tranter il 1560 e 1630, en il Grischun pernecunter enturn la mesadad dal 17avel tschientaner. [Tenor LQ]. |
