|
Avant bundant 100 onns ha il parlament federal sancziunà senza cuntravuschs il Cudesch civil svizzer (CCS). 1892 aveva Eugen Huber (1849–1923), professer da dretg tudestg e svizzer a l’Universitad da Berna, survegnì dal cussegl federal l’incarica da sbozzar il CCS. El ha terminà sia lavur l’onn 1904. Ses sboz è vegnì suttamess dal cussegl federal al parlament. Las deliberaziuns parlamentaras han durà davent da 1905 fin ils 10 da december 1907. L’emprima translaziun rumantscha dal Cudesch civil svizzer, redigida dal professer da dretg Pieder Tuor (1876-1957), è cumparida pauc suenter, l’onn 1909, cur che il rumantsch n’era anc betg reconuschida sco lingua naziunala. [tenor anr/gc] |
