|
La tschuetta nanina pon ins era observar mintgatant da di. Sco la tschuetta dal pe pailus preferescha ella guauds da guglias bain structurads cun numerusas foras da pitgalains. Insumma occupeschan questas duas spezias da tschuettas pli u main ils medems spazis da viver e sa nutreschan dals medems animals da preda. Sch’in utschè chantadur scuvra la tschuetta, cumenza el immediat a tschivlar intensivamain e prest è la tschuetta circumdada d’ina gruppa d’utschels pitschens che fan sbragizis. L’agitaziun ha in bun motiv, pertge che surtut l’enviern èn ils utschels pitschens la preda principala da la tschuetta nanina.
(Foto: Jyrki Salmi from Finland / CC BY 2.0) |
