|
Il Furca è in pass a 2431 m che collia il Vallais Sura cun la Val d'Ursera. Il num deriva dal pled latin furca, rumantsch furtga. En il temp medieval colliava la regiun dal Furca quatter diocesas, numnadamain quellas da Milaun, Sion, Constanza e Cuira. A la fin dal 12avel tschientaner èn arrivads colonists gualsers sur il Furca en la Val d'Ursera nua ch'ins discurriva da quel temp rumantsch. Il commerzi sur il Furca era impurtant per la Svizra Centrala, oravant tut en temps da guerras e miserias. Il 1926 è vegnida inaugurada la Viafier Furca-Alpsu che circulescha dapi il 1982 tras il tunnel da basa (cun transport d'autos) tranter Oberwald/VS e Realp/UR. [Tenor e-lir].
(Foto: Roland Zumbühl / CC BY-SA 3.0) |
