|
Sin in grip sur il vitg da Madulain sa chatta la ruina da la fortezza da Guardaval, construida enturn il 1250. Il chastellan episcopal, uschia raquinta la legenda, duai avair persequità e torturà en maniera crudaivla la glieud da la val ed avair pretendì per spusa la figlia d’Adam da Chamues-ch. Quel duai avair assassinà il chastellan odià e destruì il chastè cun l’agid da ses cumpogns. La legenda è sin il pli in zichel istorica e vardaivla. Sco Guglielm Tell ed auters raquints patriotics – uschia il facit da l’istoriografia – fa ella plitost palais l’imaginaziun ch’è sa sviluppada en il decurs dal 16avel tschientaner davart l’acquist da las veglias libertads reticas e svizras.
|
