|
Il territori da las anteriuras Trais Lias è caracterisà d’ina istorgia numismatica unica en Svizra. Las diesch differentas instanzas da batter munaida che pratitgavan lur dretg en quest sistem statal federalistic han procurà per bleras variaziuns da munaida. Il 958 ha l’imperatur Otto accordà a l’uvestg Hartpert da Cuira il privilegi da batter munaidas, in dretg ch’ils uvestgs han exequì fin il 1767. Cun sa liberar da l’avugadia imperiala, in pass succedì cunter la veglia da la diocesa da Cuira, è era la citad da Cuira s’acquistada il 1529 quest dretg ch’era in element tipic dals centers politics.
(Foto: Till Westermayer from Freiburg, Germany / CC BY 2.0) |
