|
Ina gruppa d'interessentas ha registrà raquintaziuns autobiograficas da numerusas dunnas dal Grischun ch’èn naschidas avant la Segunda Guerra mundiala ed edì quellas en ils dus toms «Erzählenhören» (1998) e «Das Erzählen geht weiter» (1999). «I n'è betg in cudesch dad auta qualitad litterara», scrivan las edituras, «ma quai na vul el er betg esser. Igl è sco sche ti fissas tschentà tar ina da quellas dunnas en stiva, i savura d'in bun café ed ella ta raquinta da sia vita.» Ils dus cudeschs èn cumparids en lingua tudestga. Ils texts en agiunta preschentan las duas ediziuns e reflecteschan la lavur da retschertga. |
