|
La Bibliografia retorumantscha è ina bibliografia integrala da tut las scrittiras stampadas dal Grischun retorumantsch cumparidas dal 1552 fin il 1984. Plinavant cuntegna l'ovra voluminusa er ina bibliografia cumplessiva da la musica vocala retorumantscha. La Bibliografia retorumantscha è in instrument indispensabel ed ina funtauna inexauribla per tut quels che han interess specifics per il rumantsch e per quels che s'occupan cun la lingua, l'istorgia, l'etnologia, la sociologia e la musica da la Rumantschia. L'ovra cuntegna er differents indexs: register dals auturs, dals nums, dals lieus geografics, da las materias, da cumponists ed arranschaders, dals titels e dals incipits da la chanzuns etc. [Tenor TG].
|
