L’element chemic aur è in metal cun ina structura cristallina. Aur è però er il num per in mineral che consista per gronda part or da quest element. Per il solit cuntegna aur natiral argient ed auters metals. In zic aur chattan ins en mintga sort da grip. Auas chaudas en l’intern da la terra schlavan l’aur or dal grip. En sfessas dal grip datti alura uschenumnadas avainas d’aur. Er qua vegn el schlavà plaunet e perquai chattan ins aur mintgatant en l’aua da flums. En il Grischun han ins chattà aur fin uss surtut en Surselva ed en la regiun dal Calanda. [Tenor ANR].

(Foto: © Raimond Spekking / CC BY-SA 4.0 / cropped)