A Cumbel designescha il num Porclas (1019 m), localisà al stradun 1 km al sid dal cunfin communal cun Luven, il cunfin tranter ils circuls da la Lumnezia e da la Foppa. A Porclas existiva antruras probablamain ina serra da la val. Il portal anc oz existent (construì probablamain enturn il 1300, restaurà il 1858 ed il 1912) ha in artg a piz e pudeva vegnir serrà cun duas alas. La stretga vegn er numnada Porta da femnas, sa referind a la legenda, tenor la quala las dunnas lumnezianas duain avair cumbattì qua ils 12 da matg 1352 cunter ina truppa dal cont de Werdenberg en la Faida da Belmont. [Tenor e-lir].

(Foto: T. Eckenbrecher / CC BY-SA 3.0)